login/logout

Archive for September, 2010

Posted by Mary G. Materu Msc

Inaelekea ni vigumu sana wale waliozoea pombe kukubali ukweli kwamba unywaji wa pombe unaongeza uwezekano wa kupata saratani na magonjwa mengine.  Ukweli ni kwamba pombe inaongeza sana uwezekano wa kupata saratani hasa zile za koo, kinywa  ini na matiti.  Pamoja na matatizo hayo ya kiafya, pombe inaingilia uwezekano wa kufanya maamuzi mazuri, ikiwa ni pamoja na wakati wa kuendesha gari.  Kwa maana hiyo pombe huchangia sana ajali za barabarani.  Na kwa kuwa ajali za barabarani zinasababisha vifo na kufupisha maisha, ninaamini pombe ni kitu cha kuepuka sana.  Ndio maana hata polisi wa usalama barabarani wanamchukulia hatua mtu ambaye amekunywa pombe na kuendesha gari, na pia wakati mwingine wanazo mashine maalum za kumpima mtu ili kugundua kama amekunywa pombe kiasi kinachoathiri maamuzi.

Epuka matumizi ya pombe

Cha ajabu ni kwamba katika  wiki ya usalama barabarani hapa kwetu Tanzania (Dar es Salaam) 2010, kampuni moja ya bia imetoa msaada kwa polisi (kikosi cha usalama Barabarani), na msaada huo ni pamoja na stika zinazotangaza usalama barabarani lakini hapo hapo zinatangaza pombe.  Polisi hao kwa mikono yao wenyewe wameonekana wakibandika stika hizo zinazotangaza pombe kwenye magari. http://issamichuzi.blogspot.com/2010/08/tbl-yatoa-vifaa-vyenye-thamani-ya-zaidi.html Nadhani hapa kuna mgongano wa nia au taratibu ( “conflict of interest”).  Inasemekana kwamba kampuni hiyo imetoa pia fulana zenye ujumbe wa usalama barabarani lakini naamini pia zinatangaza pombe.  Naamini kikosi cha usalama barabarani wanahitaji kufikiria tena uamuzi wao huo wa kufadhiliwa na kampuni inayotengeneza pombe huku wakitangaza pombe. Iwapo imebidi kupokea ufadhili huo basi ni muhimu kikosi hicho kukubaliana na kampuni hiyo kwamba ufadhili huo hautahusisha matangazo ya pombe wala ya kampuni yao.

Naamini wengi wetu tungependa kutangaza usalama barabarani bila kutangaza pombe!  Tunapenda kutangaza vitu vinavyoongeza ubora wa maisha sio vinavyopunguza ubora wa maisha. Tukumbuke kwamba pombe pamoja na kuchangia ajali za barabarani, inachangia sana kuongeza uwezekano wa kupata saratani hasa zile za koo, kinywa, ini na matiti. http://jipende.com/archives/tag/alcohol/ .

Tuepuke matumizi ya pombe.  Jipende, ufunguo wa mtindo bora wa maisha upo mkononi mwako!

Epuka matumizi ya pombe

del.icio.us Digg Facebook Google Twitter Mail to a friend Thank you for sharing!
Posted by Mary G. Materu Msc

Kitendo cha kugundulika maziwa bandia ya watoto wachanga Tanzania imedhihirika kwamba baadhi ya watu wanapofanya biashara hawana aibu wala woga wa kuangamiza maisha ya watu hata ya watoto wachanga. Mamlaka ya Chakula na dawa Tanzania (TFDA), ilikamata maziwa ya watoto wachanga aina ya NAN2 ambayo ni bandia. http://www.ippmedia.com/frontend/index.php?l=20025 Japo Nestle wamejitetea, lakini tunajua mfanya biashara yeyote ni lazima atajitetea.  Kitendo hiki ni cha kuhatarisha maisha ya watoto na jamii.  Ni muhimu watumiaji wa maziwa haya wajifunze kutokana na tukio hili.  Baadhi ya mambo muhimu ya kufahamu ni pamoja na:

  • Namna ya kugundua lebo bandia katika maziwa au vyakula vya watoto.  Sheria inalazimu maandishi yote kuandikwa juu ya kopo na sio juu ya karatasi iliyobandikwa kwenye kopo.
  • Sheria inalazimu maandishi yote kwenye maziwa ya kopo, pamoja na lugha nyingine yoyote iliyotumika , lakini ni lazima pia yaandikwe kwa  Kiswahili.
  • Tarehe ya mwisho  ya kutumia maziwa (expiry date), lazima iwe imeandikwa kwa kuchimbwa (ingraving) kwenye kopo, na sio kuandikwa kwa wino(mhuri) au karatasi iliyobandikwa kwenye kopo. pia sio kwenye mfuniko (hii inasaidia kupunguza udanganyifu)
  • Lazima maelezo juu ya kopo yasisitize pia  jinsi Maziwa ya Mama yalivyo bora kuliko maziwa ya kopo.

Tujipende na tuwapende watoto wetu.  Pia tukumbuke Maziwa ya mama ndio bora zaidi kwa mtoto mchanga kuliko maziwa mengine yoyote. Zipo faida nyingi kwa mama na mtoto, ikiwa ni pamoja na kupunguza uwezekano wa kupata saratani. http://jipende.com/archives/tag/breastfeeding/

Jipende, ufunguo wa mtindo bora wa maisha upo mkoni mwako!

del.icio.us Digg Facebook Google Twitter Mail to a friend Thank you for sharing!
Posted by Mary G. Materu Msc

Kama ambavyo nimewahi kusema hapo awali, baadhi ya vyakula vya asili ambavyo pia vina virutubishi (viini-lishe) vingi na pengine gharama kidogo vinasahaulika au kudharauliwa.  Leo nazungumzia nyanya-mti (wengine huliita “matungusha”).

Nyanya-mti

Nyanya-mti

Tanzania tunda hili linapatikana sana mkoa wa Kilimanjaro, Morogoro, Mbeya na mingineyo. (more…)

del.icio.us Digg Facebook Google Twitter Mail to a friend Thank you for sharing!

All Right Reserved, Copyright © 2009 - 2010 Jipende.com
Designed by Qualtek Ventures