Sehemu ya Kwanza

Ugonjwa wa moyo (coronary heart disese) una dalili kadhaa lakini mojawapo ni moyo kushindwa kazi (heart attack).  Tatizo hili la moyo kushindwa kazi hutokea ghafla na hasa kwa watu wenye umri mkubwa lakini ukweli ni kwamba ugonjwa huo unakuwa umeanza muda mrefu uliopita, pengine miaka mingi iliyopita.  Ndio maana ni muhimu kuanza kuutunza moyo mapema wakati wa ujana na zaidi tangu utotoni.

Tatizo hili huanza kwa mkusanyiko wa mafuta katika mishipa ya damu, na huweza kuendelea mpaka kuanza kuziba mishipa hiyo.  Hii hufuatiwa na moyo kukosa hewa safi (oxygen) kwa kiasi kinachotakiwa kwa sababu mishipa ya kupitisha damu imeziba na damu  ndiyo inayopeleka hewa ya oksijeni kwenye moyo.

Mambo yanayoongeza uwezekano wa kupata tatizo hili ni pamoja na kuwa na lehemu (cholesterol) kwa wingi mwilini, uvutaji wa sigara au utumiaji tumbaku, shinikizo kubwa la damu (high Blood pressure), ugonjwa wa kisukari na kutokufanya mazoezi ya mwili.

Lehemu inahitajika mwilini lakini kwa kiasi kidogo.  Hata hivyo huwezi kujua una lehemu kupita kiasi mwilini mpaka upime (inatakiwa iwe chini ya 200mg/dl).  kiasi kikubwa cha lehemu mwili husababisha mkusanyiko wa mafuta katika mishipa ya damu. Punguza hatari hii kwa kupunguza utumiaji wa mafuta yanayotokana na wanyama ikiwa ni pamoja na nyama iliyonona (nyama ya mafuta), maziwa yenye mafuta mengi (whole milk), jibini, (cheese), ngozi ya kuku na siagi. Pia ni vizurri kupunguza ulaji wa mayai,  nyama (isizidi nusu kilo kwa wiki), mafuta yatumike kwa kiasi kidogo.  Ongeza matumizi ya nafaka hasa zile zisizong’arishwa (whole grains) kama unga wa dona, (soma zaidi kuhusu nafaka zisizokobolewa), ongeza pia matumizi ya aina za kunde/maharage,  mboga mboga na matunda. Fanya mazoezi ya mwili angalau dakika 30 kila siku. (Soma zaidi kuhusu mazoezi)

uvutaji wa sigara au tumiaji wa tumbaku huongeza uwezekano wa kupata ugonjwa wa moyo kwa namna nyingi. Sumu iliyopo katika sigara (nicotine), huharibu ngozi ya ndani ya mishipa ya damu, pia huongeza uwezekano wa lehemu kujikusanya kwanye sehemu za mishipa ya damu zilizoumizwa (zilizoharibiwa). Nicotine huweza pia kusababisha mishipa ya damu kuziba au kuwa nyembamba kuliko kawaida na hivyo kuzuia damu kupita inavyotakiwa. Hapa tatizo hili linaweza kuondoka kwa kuacha kuvuta sigara au kutumia tumbaku.

Fuata mtindo bora wa maisha kupunguza uwezekano wa kupata ugonjwa wa moyo.  Sehemu ya pili itafuata…..

Jipende, Ufunguo wa mtindo bora wa maisha upo mkononi mwako….

del.icio.us Digg Facebook Google Twitter Mail to a friend Thank you for sharing!